قست أكثر 50 موقع زيارة في الجزائر، 3 فقط يتحلو في أقل من 3 ثواني

نهار السبت 17 أكتوبر 2026، من الوادي، على خط اتصالات الجزائر، قست سرعة أكثر 50 موقع .dz زيارة في الجزائر: الوزارات، الجامعات، بريد الجزائر، عدل، CNAS، المتعاملين، و بعض الشركات و المتاجر. السؤال كان بسيط: على تيليفون بشبكة ضعيفة، شحال من موقع يبيّن المحتوى تاعو في أقل من 3 ثواني؟

الجواب: 3 مواقع فقط من 50. نص المواقع ياخذو أكثر من 15.8 ثانية، و 34 موقع ياخذو أكثر من 10 ثواني قبل ما يبان المحتوى الرئيسي.

ماشي هدفي نقول أن هذي مواقع سيئة، و لا نلوم حتى واحد. أغلب المشاكل اللي لقيتها هي نفسها في مواقع شركات و متاجر كثيرة، و أغلبها تتصلح في أيام مش في شهور. الأرقام هنا صورة نهار واحد، و ممكن تتبدل غدوة.

كيفاش قست#

القائمة جات من Tranco، ترتيب أكاديمي لأكثر مليون نطاق زيارة في العالم يتحدث كل يوم.¹1 القائمة 64VVX من Tranco، تحمّلت نهار 17 أكتوبر 2026. Tranco يجمع عدة ترتيبات باش يكون صعب التلاعب بيه. أخذت أول 50 نطاق .dz عندهم موقع تاعهم: نحيت google.dz، و النطاقات اللي ما عندهاش موقع أصلا، و اللي يحولوك لنطاق آخر (كيما sonatrach.dz اللي يروح لـ sonatrach.com). لهذا كاين بزاف جامعات في القائمة: 16 من 50.

القياس بـ Lighthouse، الأداة تاع Google اللي كاينة حتى في Chrome. كل موقع تقاس ثلاث مرات على وضع الموبايل، و أخذت النتيجة اللي في الوسط باش حتى محاولة حظها سيء ما رح تقرر الترتيب. Lighthouse يحاكي تيليفون متوسط على شبكة ضعيفة: 1.6 Mbps، و 150ms بين كل ذهاب و إياب، و معالج أبطأ بأربع مرات من لابتوب.²2 إعدادات Lighthouse 13.5 الافتراضية على الموبايل، مشروحة في الوثائق تاع Lighthouse. هذا ماشي الانترنت تاع الجزائر، هذا نفس الاختبار اللي Google تستعملو لكل المواقع في العالم، و هو الحالة اللي تعيشها كي تضعف الشبكة: في الطريق، في منطقة بعيدة، أو في مكان فيه بزاف ناس. و زيادة على هذا، قست كل موقع مرة على الخط الحقيقي تاعي في الوادي.

الرقم اللي نتبعو اسمو LCP: الوقت حتى يبان أكبر عنصر في الصفحة، يعني اللحظة اللي تحس فيها أن الصفحة تحلت. Google تعتبر أقل من 2.5 ثانية مليح.³3 حسب web.dev، LCP مليح اذا كان 2.5 ثانية أو أقل. أنا أخذت 3 ثواني، و حتى بهاذي الحدود الواسعة النتيجة هي هاذي.

رتّبهم كيما تحب، و اختار موقع باش تشوف وش هو سبب بطئه:

dz.speed.boardعرض تفاعليإعادة

رتّب حسب

وقت التحميلالحجمالنقطة

اعرضكامل الـ 50

3 من 50 يتحلو في أقل من 3 ثواني. نص المواقع ياخذو أكثر من 15.8 ثانية.

1. 1FAF Connect2.3 ث
2. 2ديكاتلون الجزائر2.4 ث
3. 3الخطوط الجوية الجزائرية3.0 ث
4. 4BUAA3.4 ث
5. 5وزارة الدفاع الوطني4.2 ث
6. 6جامعة التكوين المتواصل5.8 ث
7. 7جامعة قسنطينة 16.0 ث
8. 8جامعة سعيدة6.3 ث
9. 9CERIST6.7 ث
10. 10المدرسة الوطنية المتعددة التقنيات7.6 ث
11. 11L'Algérie Aujourd'hui7.7 ث
12. 12جامعة باب الزوار USTHB8.0 ث
13. 13وزارة الداخلية8.0 ث
14. 14نفطال8.1 ث
15. 15Ecotrack8.7 ث
16. 16جامعة مستغانم8.9 ث
17. 17Competition.dz11.0 ث
18. 18أوريدو11.7 ث
19. 19NIC.dz (سجل نطاقات .dz)12.0 ث
20. 20موبيليس13.5 ث
21. 21جامعة سطيف 213.6 ث
22. 22كيابي الجزائر15.0 ث
23. 23وزارة التربية الوطنية15.5 ث
24. 24ياليدين15.7 ث
25. 25عدل (منصة التسجيل)15.8 ث
26. 26الغرفة الجزائرية للتجارة و الصناعة15.9 ث
27. 27الجمارك16.0 ث
28. 28جامعة سطيف 116.4 ث
29. 29جامعة سوق أهراس16.4 ث
30. 30الوكالة الوطنية للتشغيل16.9 ث
31. 31بريد الجزائر18.2 ث
32. 32وزارة التعليم العالي18.2 ث
33. 33وكالة الأنباء الجزائرية18.7 ث
34. 34جامعة قالمة19.3 ث
35. 35فيات الجزائر20.1 ث
36. 36جامعة بومرداس20.6 ث
37. 37CNAS22.9 ث
38. 38جامعة ورقلة23.3 ث
39. 39الإذاعة الجزائرية23.6 ث
40. 40جيزي27.4 ث
41. 41جامعة بجاية28.3 ث
42. 42وكالة المقاول الذاتي29.6 ث
43. 43جامعة بسكرة33.9 ث
44. 44منصة تكوين37.2 ث
45. 45KD Concept38.3 ث
46. 46اتصالات الجزائر47.3 ث
47. 47وزارة العدل51.8 ث
48. 48وزارة المالية53.2 ث
49. 49جامعة تيزي وزو62.3 ث
50. 50جامعة المسيلة69.3 ث

كل المواقع

FAF Connect

fafconnect.dz

شبكة ضعيفة

2.3 ث

الخط تاعنا، الوادي

0.2 ث

الحجم

1.6 MB

النقطة

98/100

• الصور1.1 MB
• JavaScript0.4 MB
• الخطوط35 KB
• CSS40 KB
• HTML31 KB
• أخرى3 KB

• السيرفر في الجزائر
• بلا CDN
• النص مضغوط
• http يروح لـ https

أكبر الحلول

1. نحّي الـ redirectsحوالي 0.8 ث
2. صغّر و اضغط الصورحوالي 0.6 ث
3. ما تحبسش أول عرض للصفحةحوالي 0.1 ث

على الخط تاعي يتحلو في ثانيتين، علاش؟#

على خط الوادي، نص المواقع تحلو في أقل من 2.2 ثانية، و 41 من 50 موقع تحلو في أقل من 3 ثواني. يعني المواقع ماهيش طايحة، و السيرفرات تجاوب مليح.

المشكل في الوزن. نص المواقع يوزنو أكثر من 4.0 MB، و 19 موقع فوق 5 MB. الانترنت في الجزائر اليوم سريعة، و على خط مليح هذا ما يبانش. لكن كي تضعف الشبكة كل ميغا تتخلص بالوقت، و الموقع لازم يخدم حتى في هاذيك اللحظة. زيد عليها أن كل ميغا تنقص من الرصيد تاع الانترنت.

الموقع اللي يتحل في ثانيتين على مكتب المطور، ممكن ياخذ وقت أطول بزاف في يد انسان عندو تيليفون متوسط و شبكة ضعيفة.

الصور: 65% من الوزن#

في نص المواقع، الصور هي أكثر من 65% من الوزن. 28 موقع يبعثو أكثر من 2 MB صور في الصفحة الرئيسية وحدها. بريد الجزائر 18.4 MB منها 17.1 MB صور، و جامعة المسيلة 32.5 MB منها 20 MB صور.

غالبا هي صور تصورت بتيليفون أو كاميرا، و تحطت كيما هي في الـ slider تاع الصفحة الرئيسية: صورة بآلاف البكسلات عرض، باش تتعرض في بضع مئات على شاشة تيليفون.

الحل:

• صغّر الصورة للحجم اللي تتعرض بيه، و اعطي للمتصفح عدة أحجام بـ srcset باش التيليفون ياخذ الصغيرة.
• استعمل WebP أو AVIF بدل JPEG و PNG، نفس الصورة بوزن أقل بزاف.
• loading="lazy" لكل صورة ماهيش في أول الشاشة، باش ما تتحملش حتى يوصلها الزائر.
• slider فيه 6 صور كبار في الصفحة الرئيسية؟ واحدة تكفي في أول الشاشة.

ما تحتاجش حتى خدمة معقدة: Squoosh يدير هذا من المتصفح، و في WordPress كاين plugins تديرها أوتوماتيكيا. و اذا كنت developer، أحسن مكتبة لهذا هي sharp في Node.js: تصغّر الصور و تحولها لـ WebP و AVIF في الـ build أو في السيرفر، و هي أسرع بكثير من الأدوات الأخرى.

CSS و JavaScript يحبسو أول عرض#

السبب الأول اللي يطلع في Lighthouse هو الـ render blocking: ملفات CSS و JavaScript في الـ head، و المتصفح ما يرسم حتى بكسل قبل ما يحمّلهم كامل. هذا في أكبر ثلاث حلول عند 40 موقع من 50، و نص المواقع يربحو أكثر من 2.7 ثانية لوكان يصلحوه وحدو.

و زيد عليه الـ JavaScript نفسو: 16 موقع يبعثو أكثر من 1 MB JavaScript، و بزاف منو ما يخدم حتى شيء في الصفحة الرئيسية. غالبا هي plugins تاع WordPress تتحمل في كل صفحة، slider، popup، chat، أو مكتبة كاملة كيما jQuery UI باش يخدمو زر واحد.

الحل:

• defer لكل script ماهوش لازم قبل أول عرض.
• CSS اللي يحتاجو أول الشاشة حطو في الـ HTML نفسو، و الباقي يتحمل من بعد.
• نحّي الـ plugins اللي ما تخدمش، و شوف واش كل plugin يتحمل غير في الصفحة اللي يحتاجها.

الخطوط و الحاجات الصغار#

بعض الأخطاء صغار لكن تكلف:

• الخطوط: وزارة التعليم العالي تبعث 1.6 MB خطوط، و جامعة سطيف 1 تبعث 1.4 MB. ملف woff2 فيه الحروف العربية و اللاتينية اللي تستعمل فقط، و font-display: swap باش النص يبان قبل ما يتحمل الخط.
• الضغط: 7 مواقع يبعثو الـ HTML بلا gzip و لا brotli: نفطال، موبيليس، ياليدين، وزارة المالية، وزارة العدل، جامعة بومرداس، و جامعة سطيف 2. سطر واحد في إعدادات السيرفر.
• https: 4 مواقع كي تكتب http يبقاو على http و ما يحولوكش لـ https: CNAS، الغرفة الجزائرية للتجارة و الصناعة، الخطوط الجوية الجزائرية، و جامعة بسكرة.
• الـ cache: أغلب المواقع ما يقولوش للمتصفح يحفظ الملفات، يعني في كل زيارة يعاود يحمّل كلش من الأول.

باش تشوف وش يربح كل حل، اختار موقع و شعّل الحلول واحد بواحد:

fixes.what.ifعرض تفاعليإعادة

الموقععدل (منصة التسجيل)

• صغّر و اضغط الصورأسرع بـ 12.4 ثمقاسكل صورة تتبعث بالحجم اللي تتعرض بيه، مضغوطة، بـ WebP أو AVIF.
• lazy loading للصورأسرع بـ 1.6 ثتقديرالصور اللي تحت أول شاشة تستنى حتى يوصلها الزائر.
• defer للـ JavaScriptأسرع بـ 0.1 ثمقاسالـ scripts يتحملو من بعد ما تبان الصفحة، و الكود اللي ما يخدمش يتنحى.
• الـ CSS المهم الأولأسرع بـ 2.3 ثمقاسالـ CSS تاع أول شاشة يجي في الـ HTML، و الباقي يتحمل من بعد.
• خطوط أخفأخف بـ 9 KBتقديرالخطوط فيها غير الحروف اللي تستعمل، و النص يبان قبل ما تتحمل.
• gzip أو brotliما كاين حتى ربح هنامقاسالسيرفر يبعث النص مضغوط.
• cache للزيارة الجايةالزيارة الجاية فقطمقاسالمتصفح يحفظ الملفات، و الزيارة الجاية تحمّل أقل.

وقت التحميل على شبكة ضعيفة

قبل15.8 ث

بعد، تقدير3.4 ث

الحجم

قبل2.9 MB

بعد، تقدير0.4 MB

الأرقام المقاسة جات من Lighthouse على هذا الموقع. الباقي، و كل رقم بعد الحلول، تقدير بنموذج بسيط.

الاستضافة ماهيش المشكل#

كي نتكلمو على سرعة المواقع الجزائرية، أول حاجة يقولوها الناس: "السيرفر في الجزائر، لهذا بطيء". الأرقام تقول العكس: 43 من 50 موقع يتخدمو من الجزائر، و السيرفرات تجاوب بسرعة: على الخط تاعي، نص السيرفرات يجاوبو في أقل من 94 ملي ثانية، و 40 من 50 يجاوبو في أقل من 600 ملي ثانية.

المواقع اللي تبطى، تبطى بسبب واش تبعث، مش من وين تبعثو. 4 مواقع فقط مور CDN (ثلاثة على Cloudflare و واحد على Sucuri)، و هذا ماشي ضروري لموقع عمومي: صفحة خفيفة من سيرفر في الجزائر تتحل في أقل من 3 ثواني بلا مشكل. و كيما قلت في مقال ليلة عدل 3، البيانات الشخصية تبقى على سيرفرات في الجزائر في كل الحالات.

باختصار#

اذا عندك موقع و حاب يتحل في أقل من 3 ثواني حتى كي تكون الشبكة ضعيفة:

1. قيس على وضع الموبايل في Lighthouse أو PageSpeed Insights، مش على اللابتوب تاعك.
2. صغّر الصور لحجم العرض، WebP أو AVIF، و lazy لكل اللي تحت.
3. defer للـ JavaScript، و نحّي الـ plugins اللي ما تخدمش.
4. خطوط woff2 فيها الحروف اللي تستعمل فقط.
5. gzip أو brotli، تحويل من http لـ https، و cache للملفات.
6. حط هدف: الصفحة الرئيسية أقل من 1 MB.

أخف موقع في القائمة هو الخطوط الجوية الجزائرية: 0.67 MB، و هو من الثلاثة اللي تحلو في أقل من 3 ثواني. هذا ماشي صدفة.

اذا عندك إضافة، أو شفت حاجة غالطة في الأرقام، أو تحب نعاود نقيس موقعك، شاركها معايا في رسالة خاصة و شكراً.

في Selance نبنو مواقع و منصات للشركات في الجزائر و الخليج، خفاف من النهار الأول. اذا موقعك بطيء على التيليفون و حاب واحد يشوف معاك من وين يجي المشكل، تواصل معايا.

الحواشي

1. القائمة 64VVX من Tranco، تحمّلت نهار 17 أكتوبر 2026. Tranco يجمع عدة ترتيبات باش يكون صعب التلاعب بيه. ↩︎

2. إعدادات Lighthouse 13.5 الافتراضية على الموبايل، مشروحة في الوثائق تاع Lighthouse. ↩︎

3. حسب web.dev، LCP مليح اذا كان 2.5 ثانية أو أقل. ↩︎